អន្តរជាតិ៖ ក្រសួងសុខាភិបាលបានណែនាំដល់សេវាសុខាភិបាលឯកជនឱ្យប្រើប្រាស់កាតចាក់វ៉ាក់សាំងកូវីដ-១៩ ដែលរៀបចំនិងបោះពុម្ពដោយក្រសួងសុខាភិបាលដោយត្រូវផ្ទៀងផ្ទាត់ និងកតត្រាព័ត៌មានអ្នកទៅចាក់វ៉ាក់សាំងឱ្យបានច្បាស់លាស់ និងត្រឹមត្រូវក្នុងប្រព័ន្ធទិន្នន័យចាក់វ៉ាក់សាំងកូវីដ-១៩របស់រដ្ឋ។ ការណែនាំនេះគឺដើម្បីធានាឱ្យការកត់ត្រាទិន្នន័យអំពីការចាក់វ៉ាក់សាំងកូវីដ-១៩ និងចេញកាតវ៉ាក់សាំងកូវីដ-១៩ ដែលធ្វើឡើងដោយវិស័យឯកជនធ្វើឡើងស្ដង់ដារតែមួយជាមួយរដ្ឋាភិបាលដើម្បីកុំឱ្យមានការពិបាកក្នុងការទទួលស្គាល់កាតវ៉ាក់សាំងទាំងក្របខណ្ឌជាតិ និងអន្តរជាតិ។

ក្រសួងសុខាភិបាលបញ្ជាក់បន្ថែមថាសេវាឯកជនដែលមានសិទ្ធិផ្ដល់ការចាក់វ៉ាក់សាំងកូវីដ-១៩ ត្រូវស្នើកាតចាក់វ៉ាក់សាំងកូវីដ-១៩មកក្រសួងសុខាភិបាល ហើយត្រូវបង់ថ្លៃបោះពុម្ពជូនក្រសួងសុខាភិបាល។ ជាមួយនឹងការណែនាំបែបនេះក្រសួងក៏មានការណែនាំពីរបៀបបញ្ជូលទិន្និន័យក្នុងប្រព័ន្ធគ្រប់គ្រងការចាក់វ៉ាក់សាំង និងដំណើរការនៃការចុះឈ្មោះនិងកត់ត្រាលើកាតចាក់វ៉ាក់សាំងផងដែរ។

ក្រសួងសុខាភិបាលបញ្ជាក់ថា៖ «គ.វ.ក-១៩ នឹងរៀបចំវគ្គបណ្ដុះបណ្ដាលដល់អ្នកទទួលខុសត្រូវផ្លូវការសម្រាបការងារបញ្ចូលទិន្នន័យក្នុងប្រព័ន្ធគ្រប់គ្រងការចាក់វ៉ាក់សាំងកូវីដ-១៩ របស់មូលដ្ឋានសេវាសុខាភិបាលឯកជនដែលបានទទួលការអនុញ្ញាតក្នុងការផ្ដល់វ៉ាក់សាំងកូវីដ-១៩ បន្ទាប់មកនឹងផ្ដល់គណនីប្រើប្រាស់ និងលេខសំងាត់ សម្រាប់ចូលប្រើប្រាស់ប្រព័ន្ធគ្រប់គ្រងការចាក់វ៉ាក់សាំងកូវីដ-១៩ ហើយគណនីប្រើប្រាស់ និងលេខសំងាត់នេះ ពុំអាចចែកចាយដល់អ្នកផ្សេងបានឡើយ» ។

កាលពីថ្ងៃទី២៩ ខែកក្កដា ឆ្នាំ២០២១ ក្រសួងសុខាភិបាលបានសម្រេចអនុញ្ញាឱ្យមន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ពព អាចទទួលការអនុញ្ញាតពីក្រសួងសុខាភិបាលក្នុងការផ្ដល់វ៉ាក់សាំងកូវីដ-១៩ជូនប្រជាពលរដ្ឋបានដើម្បីសម្រួលដល់ការលំបាកនិងពន្លឿនការចាក់វ៉ាក់សាំងបានឆាប់រហ័សជូនពលរដ្ឋ៕